2Ti 3 | NdeIBE | STEP | Kodwa nanzelela lokhu: Ezinsukwini zokucina kuzakuba lezikhathi ezinzima.

2 Timothy 3

Ukweyisa uNkulunkulu ezinsukwini zokucina

1 Kodwa nanzelela lokhu: Ezinsukwini zokucina kuzakuba lezikhathi ezinzima. 2 Abantu bazakuba ngabazithandayo, labathanda imali, labazikhukhumezayo, labazigqajayo, labathukayo, labangalaleli abazali babo, labangabongiyo, labangcolileyo, 3 abangelathando, labangathetheleliyo, labahlebayo, labangazikhuziyo, labalesihluku, labangakuthandiyo okuhle, 4 labalamacebo amabi, labacaphuka ngeze, labaziphakamisayo, labathanda injabulo kulokuthanda uNkulunkulu – 5 belesimo sokukholwa kuNkulunkulu kodwa belandula amandla akho ukukholwa. Ungahlanganyeli labo. 6 Yibo laba abahahabela emakhaya bazuze amandla phezu kwabesifazana ababuthakathaka, abasindwa yizono njalo bebuswa yizinhlobo zonke zezinkanuko ezimbi, 7 behlezi befunda kodwa benganelisi ukwamukela iqiniso. 8 NjengoJanesi loJambiresi abaphikisa uMosi, ngokunjalo abantu laba baphikisa iqiniso – abantu bezingqondo ezonakeleyo, abalahliweyo, mayelana lokukholwa. 9 Kodwa kabayikufika ndawo ngoba, njengokwalawo madoda, ubuthutha babo buzacaca ebantwini bonke.

UPhawuli ulaya uThimothi

10 Kodwa wena, wazi konke ngemfundiso yami, lempilo yami, lenjongo yami, lokukholwa, lokubekezela, lothando, lokuqinisela, 11 lokuhlukuluzwa, lezinhlupheko – izinhlobo zezinto ezenzakalayo kimi e-Antiyokhi, lase-Ikhoniyami, laseListra, lezinhlupheko engazithwalayo. Kodwa iNkosi yangihlenga kuzo zonke. 12 Impela, umuntu wonke othanda ukuphila impilo yokulalela uNkulunkulu kuKhristu uJesu uzahlukuluzwa, 13 kukanti abantu ababi labakhohlisi bazakonakala ngokudlulisayo, bekhohlisa labo bekhohliswa. 14 Kodwa wena qhubeka ngalokho okufundileyo njalo wakukholwa, ngoba uyabazi labo okufunde kubo, 15 kanye lokuthi kusukela ebuntwaneni wayazi njani imibhalo eNgcwele, engakwenza uhlakaniphele ukusindiswa ngokukholwa kuKhristu uJesu. 16 IMibhalo yonke yaphefumulelwa nguNkulunkulu njalo ilosizo ekufundiseni, lokukhuza, lokuqondisa, lokufundisa ngokulunga, 17 ukuze umuntu kaNkulunkulu ayilungisele ngokupheleleyo yonke imisebenzi emihle.